睇收費電視台嘅立法會選舉論壇，覺得不知所謂，簡直是一場胡鬧，各候選人互相指罵，論壇主持人煽風點火，更似連場潑婦爛佬在街市鬧交嘅reality show，睇完就唔想去投票。搞成咁，一來係電視台旨在做騷，係要將政治搞到低俗化，不以政綱討論，政治、經濟、民生話題為主題，特登注重啲八卦cheap料。呢種節目風氣之始作俑者乃係無綫電視，咁多年專門將專業評論變成娛樂八卦化，例如搵不識體育之明星歌星去評論奧運。
上星期美國共和黨在全國代表大會，正式提名Romney、Ryan為總統、副總統候選人，左丁山在辦公室睇霍士電視直播，呢間電視台屬梅鐸新聞集團，逢共和黨必捧，對Ann Romney演講，大讚特讚不在話下，連自由派電視台CNN（奧巴馬擁躉）嘅資深總統大選節目主持人都讚口不絕，咁先至奇。美國女人的確有政治天分，譬如羅姆尼夫人咁，一世人未在任何機關打過工，讀完書就做家庭主婦，居然面對全國電視直播演講，都揮灑自如，香港政治人物，即使係大律師上台演講，都難以同佢比較，賴恩（Ryan）嘅演講冇咁生動，稍嫌機械化，不過內容比較充實，奧巴馬位副手拜登同佢辯論嘅話，好難得到甜頭。
賴恩只得42歲，1992年自俄亥俄州牛津市嘅邁亞密（Miami）大學（全國排名第90名）畢業，主修政治經濟，論學歷難與老布殊、小布殊、克林頓、希拉莉呢啲耶魯校友，以及奧巴馬、羅姆尼呢兩位哈佛校友相比，東岸精英會睇佢唔起，但點解在美國政壇爬升得咁快呢？紐約時報（奧巴馬粉絲）特登追查佢嘅背景，發覺賴恩成功主要靠（一）個人規律，（二）勤力、聚焦、不分心。賴恩讀書時就受保守派經濟學說影響，喜歡海耶克、von Mises與佛利民，後來跟老師閱讀Ayn Rand，出道以來就同保守派智庫廣結善緣，畢業就得老師推薦到華盛頓做議員助理，與同學一齊租樓住，用破爛傢俬，因薪水微薄就在餐廳做兼職侍應，每上班必準時絕不遲到，永遠穿着整齊衣服，勤力到連餐廳高層都認為佢好有前途，到咗27歲，家鄉威斯康辛州有眾議員競選參議院，出現空缺，佢立即回鄉參選，無錢無名氣，只有努力拼命，居然一戰功成，成為最年輕眾議員，今年成為副總統候選人，政治新星，如果當選嘅話，會成為一個美國奇蹟！