「一係唔貪，一貪就要貪夠1億！」當年華仔做《五億探長雷洛傳》，留下呢句對白；今日用番周一喺德意志銀行錦標賽，以總成績266桿得第3，職業生涯累積獎金逾1億美元（約7.8億港元）嘅活士身上，一樣合適，不過「老虎」唔係貪，而係贏啫！只要佢保持好表現，仲有機會贏多1,000萬美元㖭呀!
負麥艾萊兩桿得第3
呢位前「1哥」其實喺最後一日打得好好，交出低標準桿5桿嘅成績，單日成績仲好過以1桿險勝南非球手奧斯杜辛奪標嘅北愛「1哥」麥艾萊；不過，麥艾萊喺今次比賽表現真係好穩定，錄得總成績264桿，所以活士就算臨尾發力亦經已太遲。但唔緊要，活士攞第3都可以得到544,000萬美元（約422萬港元）獎金，令到佢嘅職業生涯累積獎金去到1億零35萬美元，成為首名PGA球手累積獎金超過1億美元嘅球手！
多得活士喺1996年突破冒起，多咗人入場同喺電視睇高爾夫球，令到PGA收入多咗，獎金亦自然好似坐咗火箭咁急升。佢自己都話，好彩開個頭開得好，先可以贏到咁多獎金。活士話：「職業生涯初期贏到幾個大滿貫，有個好開始真係好。我諗最重要係比賽多咗好多新血，令到趣味性高咗。」用「幾個」嚟形容自己14次大滿貫錦標，活士你真係謙虛；不過真係多得你，睇高球真係精采唔少。
狀態回升再爭聯邦盃
狀態回升再爭聯邦盃
呢隻36歲嘅猛虎，雖然因為感情缺失而沉淪咗成30個月，不過今年已經開始蘇醒（見附表）；雖然同巔峯狀態有距離，但係絕對唔可以睇小。而今次嘅好表現，令到活士有機會爭巡迴賽聯邦盃（FedEx Cup）嘅額外1,000萬美元獎金。
知多啲：聯邦盃計積分
聯邦盃（FedEx Cup）係一個4站巡迴賽，由巴克萊高爾夫球精英賽、德意志銀行錦標賽、BMW錦標賽（9月9日）和巡迴賽錦標賽（9月23日）組成。這個巡迴賽採取計分制，而且每站都會淘汰一部份積分較少的選手。在最後一站將會由頭30名選手競逐冠軍，而最高分的選手在巡迴賽錦標賽後，可得1,000萬美元（約7,800萬港元）獎金。
活士職業生涯大事表
1996年：成為職業球手
1997年：奪得高球大師賽錦標；6月成為世界排名第一
1999年：開始264周的「1哥」生涯
2000年：成為自1948年後，首名球手連奪英國、美國公開賽（圖）及PGA錦標賽等6個冠軍，成就職業金滿貫
2003-04年：未能奪得任何大滿貫，開始改善揮桿
2005年：重奪「1哥」地位
2009-10年：「偷食」事件曝光，2010年8月與艾蓮離婚；同年全年未獲一勝，失去保持281周的「1哥」地位
2011年：換球僮求變，但因傷患進入「無冠狀態」
2012年：3月奪阿諾龐馬邀請賽錦標，破30個月冠軍荒；於德意志銀行錦標賽得第3，成PGA史上首位累積1億美元獎金球手
資料來源：《蘋果 》資料室