利物浦開季3戰只得1分，連班主約翰亨利都要發公開信，叫球迷保持耐性；不過轉會市場就唔等利物浦嘞，上周五關閉後，利物浦想擴軍就只可以簽自由身球員。利物浦市最出名就係傳奇組合披頭四，如果領隊羅渣士都想懷舊，自由身市場上竟然有4位紅軍舊將等緊佢，睇吓佢會唔會帶其中一人回巢。
紅軍輸畀阿仙奴，英超開季只得1和2負，得1分排尾三的第18位，領隊羅渣士賽後好後悔咁講，將安祖卡路爾借咗去韋斯咸，最快要到明年1月先收得番，但韋斯咸講明留人；球隊得番兩個正前鋒，波連尼就名大於實，搞到蘇亞雷斯孤掌難鳴，羅渣士要改善成績，就點都要搵番個前鋒。
頂卡路爾可簽希斯基
英國嘅《鏡報》就認真心水清，列出6個自由身前鋒畀利物浦揀，當中竟然有4個效力過紅軍，都叫有感情分。最好選擇就當然係奧雲仔，唔係，應該叫奧雲佬嘞，事關佢已經32歲，不過當年佢喺紅軍出道時，同謝拉特、列納、麥馬拿文等合作，簡直就係天衣無縫；只要紅軍球迷原諒佢上季效力死敵曼聯，對球隊都仲有幫助。不過瘦田冇人耕，耕開就有人爭，奧雲佬都仲有史篤城、新特蘭同愛華頓3隊選擇，史篤城更出到150萬鎊年薪，絕對有誠意，而奧雲亦都話明星期三先決定去向。
家安祖卡路爾借咗去韋斯咸，利物浦想加強番高波戰術，希斯基都係好選擇，話晒上季都仲踢緊維拉，狀態點都有保證，不過如果想後生番啲，法國前鋒龐高尼都得，佢只得27歲，球員嚟講一啲都唔老，上季由士砵亭外借畀聖伊天，但今季就同士砵亭約滿離隊。
杜奧巴迪比亞路有份
如果唔想搵舊將，都仲可以考慮吓杜奧巴同迪比亞路；不過傳上海申花呢期又放番水，杜奧巴有糧出，就未必走住，迪比亞路之前傳過去澳洲搵食，但佢又唔想離開意大利太遠，睇嚟對加盟利物浦興趣都不大。