專門代理富士菲林嘅中港照相（1123），老闆孫大倫終於放手，交棒畀34歲阿仔孫道弘（Stanley）。Stanley呢個月開始轉做行政總裁，62歲嘅孫大倫只做主席，退居幕後。香港幾間家族持股嘅上市公司，隨住話事人年紀漸長，股東都會關注公司傳承問題，新世界發展（017）同長實（001）今年先後公佈接班人計劃，新世界創辦人鄭裕彤實行乜都唔做退休，交畀阿仔鄭家純同阿孫鄭志剛打理集團，長實主席李嘉誠未退休，但講明上市王國由長子李澤鉅接掌。
孫道弘掌6億照相王國
中港照相唔係大藍籌，但都係一隻有6億市值嘅上市公司，公司1968年由孫建業創立，孫大倫已經係第二代，家陣係交由第三代接掌。常言道富不過三代，但睇嚟孫大倫對阿仔滿有信心，見Stanley大學畢業後，喺公司做咗七年，已經有足夠經驗，而且非常熟悉公司運作，先決定交棒。能唔能夠打破富不過三代呢個咒語，真係要睇Stanley表現！好似話，Stanley同鄭志剛係好朋友，之前Stanley喺銅鑼灣開照相館，開幕當日，鄭志剛都有到場祝賀，兩位以後可以多啲交流接掌上市公司嘅心得啦。李華華mailto:[email protected]