一間酒吧之所以能夠吸人長期捧場，一定係有其吸引之處。一係靚女特別多，一就主題派對又多又好玩，係咪先？而今次介紹呢間「DADA Bar」，就兩個優點都集於一身。 文、攝：吧少
我一踏進呢間場，已經發現場內靚女多到令人目不暇給，而且當中唔少係猜拳寶貝，淨係呢樣就足以令呢度成為潮男嘅至愛蒲點啦！更何況呢間吧喺搞節目方面仲相當積極，過去兩個月就搵過韓國組合Diana表演；奧運會舉行期間，又推出倫敦奧運中國紅，靚女人客全以紅色裝束亮相；最近期仲玩過水晶七夕㖭。至於呢個月14號（星期五）又將會搞「光影魔幻夜」，全晚都係激光舞蹈，閃爆呀！我好奇，有咁強嘅猜拳寶貝陣營，仲有乜必要頻頻搞咁多新花臣呢？
「你有所不知喇，近兩年羅湖嘅酒吧越開越多，新場一定地方夠大有晒主題，對傳統嘅酒吧帶嚟好大嘅衝擊。淨係靠班猜拳寶貝撐場，人客玩厭就會流失，所以要不停有新搞作至可以留住客人㗎。」經理小金娓娓道來。
好老實嗰句，好多蒲友包括本人在內，都承認如果一間場有超過30位猜拳寶貝做主力，當中仲有唔少屬高質嘅，基本上已立於不敗之地。再加埋咁多主題節目，難怪呢度連閒日上去玩都要逼餐飽啦！唔講咁多喇，班猜拳寶貝排晒隊等我，今晚，睇怕極有可能又再刷新我嘅劈酒新紀錄嘞！
DADA Bar
地址：深圳羅湖區南湖路鑽石廣場首層
電話：（86）755-82611111
營業時間： 8:00pm-4:00am
酒水收費：軒尼斯V.S.O.P
套餐價：700ml¥850、1.5公升¥1,880、3公升¥3,980