早排先講完《爽報》「300萬爽組合」其中兩位燈神參賽者——火燎森同肥仔孫柏文嘅威水史，話口未完，「神蹟」又再出現。話說孫柏文噚日喺本報專欄以「可憐的有線寬頻」為題，大數有線寬頻（1097）旗下有線電視不是，話佢哋搞立法會選舉論壇嗰陣，竟然cut咗助選團隊食煙嘅鏡頭，有自我審查之嫌。點知個欄出街後，突然傳出政府會重新發放免費電視牌照，有線寬頻即刻爆升三成，死股都翻生，唔少花生友話係拜肥仔開金口所賜。對於俾人話佢燈神再顯靈，孫柏文大呼冤枉，話專欄只係探討傳媒溫水煮蛙嘅情況，絕對冇就股價作評論，唔多關事咁話。問佢有冇買到有線，佢就懶神秘唔肯講，唔通佢嘅真正身份係另類渾水？