角色扮演遊戲（RPG）機迷心目中，《Final Fantasy》肯定係經典中嘅珍品！像日前喺澀谷舉行嘅25周年活動，更引來數千Fans專程潮拜，排喺龍尾嘅要等五粒鐘先入到場！ 記者、攝影：陳國輝
《FFXIII》新作明年開賣
粉絲們翹首以待嘅所謂「FFXIII-3」，從畫面、資料，甚至遊戲Title一直都只喺網上瘋傳，官方從未作正式公開！趁25周年，Square Enix（SE）終於為此作命名為《Lightning Returns: FFXIII》。追開嘅人都知，Lightning自《FFXIII-2》作客串之後已經無再出現，今次除咗復出作主角，遊戲製作人北瀨仲話，概念上Lightning將會以光、速度、元素三個形態展現，並以最後13日作故事中軸，在真實世界時間上進行。但所謂嘅三種形態究竟係乜傢伙，呢樣就要等Fans自己揣摩喇！
SE公佈遊戲喺明年推出，雖無確實日子，但現場就有不作對外公開嘅遊戲示範。從畫面上見到，人物角色起晒格，而且搵工作人員做臨記扮「聲優」，認真爆笑！但各位又唔使驚住，事關官方話完成度只有30%，效果係咁上下；值得留意係戰鬥期間，Break System由以往只能出一次，呢集增加到三次，在靜止狀態下打大佬，就好似表演咁爽。另外，遊戲還提供幾十套衫以及新武器畀你更換，甚至喺跳上跳落等攀爬動作方面亦出現更多細節位。
粉絲爭睹天野喜孝畫作
既然係《FF》25周年，又點少得一連串慶祝活動！SE選址澀谷新場Shibuya Hikarie作公眾開放，首日朝早已經有過千人列隊等入場，龍尾更伸延到JR車站內。展覽入面除咗有1:1遊戲模型例如武器、衣服之外，最叫Fans期待肯定係插畫師天野喜孝嘅作品展，包括幾十幅《FF》原稿、彩繪，以及特別為25周年而繪製嘅主題Poster。當然，粉絲亦可回顧番咁多代《FF》嘅遊戲盒帶，從經典嘅老任年代，一直到最新PS3作品都有詳細介紹；SE更體貼到提供FF Cafe，行到攰攰哋可以休息吓，飲番杯嘢！
日籍粉絲開講
全套13集售$3,500
現場除了公佈明年會推出《Lightning Returns:FFXIII》，還分別宣佈《FF 25th Anniversary Ultimate Box》以及《FF Dual Pack》兩款遊戲合版。前者集結第1-13集包括PS、PS2及PS3平台嘅遊戲，售價35,000日圓，指定12月18日於日本發售；後者則結合《FFXIII》及《FFXIII-2》Dual Pack，中英文合版售價$558（連八張典藏Postcard），香港9月13日推出。
