在反國民教育洗腦浪潮下，昨日是香港第一個黑色開學日，星級父母紛紛出動親自湊子女返學，陳慧琳（Kelly）接3歲的蝦餃仔劉昇放學，Kelly力撐學民思潮，並謂欣賞學生關心社會的志氣。郭晉安表示驚國民教育殺埋身，考慮安排兒子讀國際學校。胡諾言和大肚老婆陳琪擔心如白紙的女兒會被荼毒，連未有子女的何韻詩、黃耀明、杜汶澤等群星亦齊撐黑衣行動，憑良心反洗腦！
政府漠視民意硬推國民教育科，昨日全港學校開學了，學民思潮及民間反對國民教育大聯盟，呼籲市民穿黑衣或纏黑帶迎接黑色開學日，一班星級父母亦很關心以絕食抗爭的學生們。潮媽陳慧琳昨早11時接3歲蝦餃仔劉昇放學，她提早5分鐘抵達位於紅磡的幼稚園，穿米色短袖衫、牛仔褲和波鞋現身的她，見到大批記者守候時笑說：「咁齊人呀！」即企定定任記者拍照，十分合作。
擔心絕食學生健康
暑假前還要工人和媽咪抱抱的蝦餃仔，昨日升K1終於大個仔自己落地行了，不過一臉惺忪似未瞓醒，記者不停叫：「蝦餃仔！」Kelly即說：「叫佢劉昇或者英文名啦！」還蹲下陪兒子接受訪問，記者問蝦餃仔返學有冇喊？他兩手攤開，天真地說：「冇呀！」問他返學是否很開心？他卻突然變怕醜仔，衝埋媽咪身前扭抱，廿四孝Kelly即乖乖帶他上車返屋企。
對於民間反對國民教育科大聯盟向特首梁振英發最後通牒，要求昨午5時限期前撤回國民教育科，惟死線已過政府仍無動於衷，大聯盟指會無限期絕食，Kelly昨接受本報記者電話訪問說：「好欣賞佢哋咁關心社會，自己作為父母，擔心佢哋身體健康，希望快啲達到共識解決問題。」
胡諾言盼下一代好
無綫藝人胡諾言和老婆陳琪的3歲女兒芷苓（Jay）在九龍塘樂基幼稚園讀K1，他們昨早10時齊齊湊女放學，囡囡扭計向父母投訴又熱又被蚊咬，胡諾言謂前晚拍劇開工到半夜，雖然好辛苦，但老婆大肚懷孕7個月，怕難搵位泊車，他堅持要陪老婆湊女，陳琪透露囡囡在學校表現OK，她說：「自己對小朋友要求好高，老公話要嚟睇返學，為第二個囡囡做準備。」雖然他們昨日沒有穿黑衫，但內心卻是反國民教育，陳琪坦言：「初時感覺唔強烈，但聽得多之後好驚，小朋友好似一張白紙，講一句都會學到。」她覺得愛國是好，但不能單向發展。
胡諾言亦跟老婆同一陣線說：「前兩日睇集會嘅新聞，真係有好強感覺，後生仔都可以去，點解我哋唔可以去支持，我係普通市民，唔可以講好唔好，但要攞平衡，希望下一代好。」
郭晉安支持反洗腦
此外，已有一仔一女的郭晉安昨日在將軍澳電視廣播城開工拍劇，雖然長子郭令山只是就讀幼稚園，他仍然關注國民教育，支持反洗腦行動，他說：「支持，當然支持啦，我諗係每一樣嘢係咪要咁快咁硬性規定呢？咁會有少少問題，係咪個諮詢可以再耐啲，我哋唔係小朋友，我諗我都唔會咁教小朋友，逼佢做一啲嘢，更加唔好喺教育上面逼佢一啲思維，即係我做父母嘅角度係咁睇。」政府拒絕撤回國民教育，學校和教師可能會將行動升級，安仔說：「呢個比較激進啲，我小朋友係讀緊幼稚園，唔好要佢罷課住，佢會好悶㗎！」
蔡卓妍昨以黑衫反對國民教育：「絕食嘅小朋友好陰公，如果咁多人反對，係咪可以諮詢一吓，我兩個鐘唔食嘢都會肚餓喇。」
採訪、攝影：胡比、魯萍、楊潔雯、陳慧安、林德雄
藝人反洗腦
黑色開學日，師生以黑衣走進課室反洗腦，藝人也熱烈響應，何韻詩、杜汶澤田蕊妮夫婦和黃耀明等紛紛在微博上載黑衣照，以行動向國民教育說不。
