招商證券（香港）董事總經理溫天納幾時多咗位兄弟叫溫天立㗎呢？內地民營投行華興證券噚日宣佈，請咗溫天立做董事總經理及股票研究部主管，此納同彼立有乜關係呢？
查實兩位溫生係冇關係嘅。單睇外表造型，更加以為係來自兩個世界嘅人，唯一相同，就係兩位都係男人，同埋做金融呢行。
新識呢位溫天立未加盟華興前，係未來資產科網股分析總監，再之前曾經喺摩根士丹利做分析員。華興亦都係新嚟嘅，6月先進駐香港，係第一間「走出去」嘅內地民營投行。
溫天納就真係有位孖生細佬叫溫天絡，佢哋曾被稱為「投行雙子星」，點知細孖因為被裁定冇就東大照明（8229）招股做好盡職審查，上年畀證監釘牌六年，搞到得番大孖喺金魚缸游。溫天納同溫天立兩個名咁似，讀音又一樣，以後提到兩位都要搞清楚先得喇。