咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
《牛腩篇》今周讚人之前先自插；話說上周六英超史雲斯對新特蘭一戰，球員步入球場時，小弟忍唔住指住電視機大笑：「呢個史提芬費查何德何能值1,200萬鎊，踢狼隊幾勁都冇用，咪又係降班，踢法粗枝大葉；嗱，阿當莊臣1,000萬鎊就差不多價，起碼踢大會都有貨交，有技術有速度，曼城唔要佢真係浪費。」唔知史提芬費查係咪聽到我講嘢，作客史雲斯竟然梅開二度，助新特蘭賽和2:2，終於搞到呢隻天鵝今季首次失分。咁當然小弟唔會因為一場比賽，就對史提芬費查改觀，佢仍然係腳法平庸，得鋪蠻力。不過新特蘭領隊奧尼爾就真係值得一讚。由帶李斯特城成名，爆冷攞過聯賽盃，到轉投些路迪做山寨王，之後任維拉領隊；由護級分子打造成爭歐洲賽球隊，就知奧尼爾呢種堅持體力化壓迫踢法，係就係觀賞性一般，但身處英超中下游，呢招已經夠煞食。特別係2011年尾接手新特蘭，立即扭轉「黑貓」頹勢，成功護級之餘，和曼城、贏利物浦都算代表作。難得高層支持，奧尼爾今季繼續執靚個陣，維拉時代，佢已經鍾意用老將，睇嚟沙夏及古拿都有機會搵番第二春；而且艾舒利楊格、達寧、艾邦拉荷等新星，都係奧尼爾帶起，可以預期阿當莊臣、域咸等「少黑貓」兵，都有進步空間。文：牽牛