【本報訊】新地（016）屯門瓏門勢高開，加上「梁十招」完全冇料到，區內二手樓市陷入瘋狂。全城繼續搶貨，時代廣場有單位兩天搶貴近一成，呎價衝上6173元新高。屯門市廣場「辣招盤」都被炒貴近四成。 記者：朱連峰、湯家明
瓏門尚未開賣，已炒㷫屯門樓市，尤其是該盤周邊的二手屋苑，包括屯門市廣場、錦華花園及時代廣場等，本月首三天已連環10多宗買賣，樓價越搶越貴。新盤又揚言高開，屯門多達30%業主加價封盤。
祥益地產分行經理袁思賢直言「呢幾日搶得好癲」，最瘋狂的就是一個單位竟於兩日賣兩次，炒貴近一成。時代廣場E座中層1室，面積452方呎，上月30日原以256萬元賣出，但兩日後，即9月1日再以279萬元賠定再賣。「嗰晚業主打嚟通知我，話單位再賣咗279萬，叫我同個客講唔好意思，會賠番10萬定畀佢」。扣除賠定及佣金，業主仍多賺約5萬元。她亦稱，「其實個客都醒，知個市癲，落多啲定，等業主冇咁易反悔，但最終都係畀人撻（定）」。該單位成交呎價6173元，為同類最貴，亦為屋苑呎價歷史次高。
辣招盤炒高四成
買樓不成的買家是區內租客。袁思賢稱，該租客買樓遭業主撻定後，翌日即再入市，惟全城缺盤，「辣招盤」照搶，以280萬元購入屯門市廣場4座高層C室，523方呎，呎價5354元，同樣落10萬元定金。原業主前年12月僅以202萬元購入，辣招貨不足兩年炒貴38.6%。
此外，鄰近的錦華花園B座頂層連天台特色戶，480方呎，售295萬元，呎價6146元，創屋苑歷史新高；另B座高層2室，480方呎，原叫價270萬元，最終搶高2.5%至276.8萬元成交。
瓏門效應，天水圍居屋也破頂。祥益地產分行經理蕭嘉偉表示，天盛苑E座高層1室，828方呎，售230萬元，貴絕區內綠表居屋。同區嘉湖山莊景湖居14座低層H室，704方呎，因「有樓睇」而賣貴5萬元，以245萬元成交，呎價3480元。
瓏門周內定價 迎海力撼
儘管政府出招欲為樓市降溫，惟醞釀開賣半年的瓏門，推售步伐未見放慢，相反，新地（016）打鐵趁熱，今日開放特色示範單位供傳媒參觀，周內定價兼開賣，除新地外，恒地（012）與新世界（017）的馬鞍山迎海，並亦步亦趨，項目有望本周取得售樓紙，加入搶客戰。恒地營業部總經理林達民表示，迎海即將開售，三房入場費料逾800萬元。兩盤約2000伙大有機會本月埋身火併。
另一邊廂，資深投資者羅家寶旗下公司持有的前身沙田雍雅山房，定名雍雅山，蓄勢短期內推售。該盤建21幢洋房，接受市場預約，料趕在年內搶攻洋房客源。
除即將有新盤開賣地區的二手市場活躍外，整體二手市場因盤源漸減，市場消化政策措施，成交轉慢。利嘉閣數據指，50個屋苑上周錄297宗成交，一周跌近14%。
新盤最新動向
新盤名稱：屯門瓏門
發展商：新地、港鐵
最新動向：周內開放示範單位及公佈定價
單位總數（個）：1075
新盤名稱：馬鞍山迎海
發展商：恒地、新世界、培新
最新動向：日內料最得售樓紙
單位總數（個）：928
新盤名稱：沙田雍雅山
發展商：資深投資者羅家寶
最新動向：接受預約參觀，短期內參戰
單位總數（個）：21（洋房）