第5次戰殘奧嘅「神奇小子」蘇樺偉，周日喺倫敦殘奧100米跑（T36級）決賽，以12秒28只得「梗頸四」，喺佢近4屆奧運第1次冇100米牌落袋。衝線後見「神奇小子」目光呆滯，事關佢同第3名嘅烏克蘭選手派歷克只差0.02秒（冠軍喺跑12秒08嘅俄羅斯選手舒維哥夫）；「神奇小子」唔開心就一定有，因為佢對上3屆殘奧啱啱儲齊金（00年悉尼）、銀（04年雅典）、銅（08年北京），今屆差少少失落獎牌，希望佢唔會被打沉啦，因為周四仲有重任，就係喺200米跑力爭衞冕。而且唔少對手都會出戰，包括100米銀牌嘅英國選手巴勒特，以及銅牌嘅派歷克都會參加，偉仔大可喺200米復仇呢！
余翠怡今亮相搶金
記得偉仔喺4年前北京殘奧中，都係先於100米跑失望而回（只得銅牌），之後就喺200米大發神威，以破世界紀錄嘅時間取得金牌。在此祝福下個月滿31歲嘅偉仔，喺200米發威奪金啦！田徑場以外，今日上場為港隊搶金嘅，仲有以余翠怡為首嘅輪椅劍擊隊，大家為佢哋加油啦！