噚日周街黑衣人，無他，大家都響應民間反對國民教育科大聯盟呼籲，穿上黑衣以示對硬銷國民教育科嘅特區政府不滿。狼英政府上場兩個月，僭建風波已令佢誠信破產，樓市政策又搞到民怨沸騰，家仲要得罪埋眾多師生及家長，生於7月14嘅佢，真係見過鬼都唔怕黑。狼英第一打手林鄭指反對者手法激進，以唐牛上周六在政府總部現場所見，參與集會人士都非常和平同理智，唔講仲以為係搞緊嘉年華，點都唔存在佢講嘅激進行為。但願咁多位絕食人士保重身體，始終冇嘢比健康更重要。
講番股市，中美醞釀放水，股市振奮，唔少績優股更悄悄炒上，好似噚日推介嘅寶峰時尚（1121），進賬近6%。半年勁賺1.2億銀人仔嘅安東油田（3337），噚日抽升6.5%，收報1.65元，以大陽燭創逾4年新高，成交亦大增逾倍至32球，動力十足，現價年度化市盈率11倍，絕對唔貴，倘市況配合，炒上兩蚊亦唔出奇。
唐牛