舖位市場炒到㷫烚烚，連有唔少自置物業嘅致富證券都跟潮流，有意將家自用嘅舖位放盤。聽講，致富最近想將深水埗福華街102號地下連閣樓舖放售，叫緊5000萬，成個舖夾埋有2700呎，計番呎價超過1.8萬。
呢個舖係致富喺03年尾樓市低潮嗰陣，趁低吸納買番嚟，買入價只係980萬，最近舖位炒到不得了，如果真係有人攞5000萬幫致富買咗個舖，致富就一鋪勁賺4000萬！就算致富用售後租回方式吸引買家買，賺到嘅錢相信都夠交廿年租。
睇番資料，連埋總部，致富喺香港有21間分行，由西環到觀塘，遠至上水都有自置物業，夾埋有14間係自己舖，比例相當之高。若果今次賣深水埗舖賺到大錢，唔知會唔會放多幾間舖呢？