咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
《咖喱篇》上星期講到英超踢法嘅改革，球員需要去適應潮流嘅改變；今個星期就要插吓熱刺，對象唔係波亞斯，而係佢老細利維。熱刺搵嚟波亞斯執教，又要搞改革，摒棄哈利列納過去雙翼齊飛嘅戰術，改為前場球員自由走位、靠短傳入楔嘅踢法。波亞斯嘅開局唔太順利，踢咗3場聯賽都未贏過，主因係根本班波都未夾過！臨到轉會窗完結，熱刺先至賣咗莫迪歷同雲達華治，買番艾迪巴約、迪比利同丹普西等新血，試問呢班人邊有時間去夾！眾所周知，熱刺嘅轉會由主席利維負責，但佢作為生意人，好容易會將一角幾毫睇得太重要，而唔記得家唔係打機，波係要夾㗎！好似上季，佢又係拖到最後先買柏加救亡，今季就為咗拎多皇馬少少着數，將莫迪歷單交易拖足成個月，結果壓死晒啲資金，搞到啲轉會唔到deadline都落實唔到，最後仲買唔成摩天奴㖭！家波亞斯係要踢走位同短傳嘅足球，默契係好重要，球員亦要時間去適應佢嘅理念，而利維就為咗少少錢而犧牲咗季前寶貴嘅時間。試諗下，如果熱刺晨早就搞掂大部份嘅轉會；家呢個班底可以夾到成個月，去迎接英超開「咧」，我相信佢哋會有更好嘅成績。利維只見到支票嘅銀碼，而見唔到時間一分一秒嘅流逝，係佢令到熱刺輸在起跑線。文：咖喱