大話英急急推出梁十招挽民望，令劏房局長陳謬波都被迫要出席電台節目解畫，但大家有冇留意，謬波前日竟然係同運輸及房屋局長張炳良一齊出席電台節目。眾所周知，局長好少要孖咇制去烽煙；有官場中人透露，謬波局長唔熟書，咪要張炳良傍住現身囉；有人更封佢哋為「茂炳」二人組，相信繼續以Twins姿態出巡。
為梁十招四出解畫
上屆政府講樓、講土地供應，好多時都由司長、局長單拖上電台應戰，冇乜需要出動兩個巨頭一齊解畫。時移世易，今時今日嘅狼班子，查實唔係太多「哥利」，尤其劏房局長陳謬波，不時被人話佢唔熟書。
八方聽聞當得悉梁十招要出台，局長要四出解畫時，謬波都有啲膽怯，話政策唔係發展局自己搞晒，最終結果呢，就係佢獲得張炳良陪住上電台壯膽囉。據聞茂炳二人組，出騷機會陸續有嚟，謬波暫時唔會孤身上陣。
查實唔畀謬波單拖現身，無非係唔想佢再畀記者問劏房醜聞；但點估得到喺日前記者會上，冇人就此挑機，據聞預備咗官腔回應嘅政府中人都好意外。有泛民中人卻預告，只要佢哋9月重返立法會，一定返嚟就郁，唔會輕易放過謬波，唔知張炳良屆時仲會唔會幫拖？
mailto:[email protected]