內地宣佈准許深圳市非戶籍居民來港自由行，據講合資格人士有四百一十萬咁多，呢批人或許不是高檔消費者，但不應一棍打死，話人地係民工、冇錢低收人士。須知道內地有不合時宜但適合政治控制嘅戶籍制度，外省人到深圳打工、居住，未必一定可以攞到戶籍。其實中國人不可以自由地到外地旅行，有違國際人權，中國人要得到政府批准，先至可以到中國地方香港旅行，香港嘅人權監察組織其實應該代佢地出頭，抗議、爭取。
香港有好多短視派，一聽見深圳有非戶籍居民來港自由行，就去政府總部抗議，極之民粹，本不值一提，但香港啲傳媒亦缺乏分辨能力，盲目跟風煽動，要鬧埋一份。每年六四，民主派人士大聲疾呼做乜？為六四「平反」而已，「平反」係共產黨字眼，意思係共產黨可以改變一啲歷史判斷、歷史觀點，而呢啲改變係視乎政治需要。六四做乜要平反？共產黨中國應該要在人民大會通過正式議案，向六四死難者及示威者道歉，同時為過去三反五反大躍進文革之錯誤道歉，只有咁樣，共產黨中國才能堂堂正正地邁向廿一世紀大國之林，若不如此，「盛世」個屁。
六四示威代表爭取民主、自由。具體嚟講，人民出外自由行就係中國人民爭取個人自由之第一步，第二步就係廢除所有旅行限制，國民隨時可以離開，去外國旅行，好似香港人一樣。他日若做到呢一點，中港兩地來往，返回民國年代，自由無管制，唔通啲民主派、環保派，又要出嚟嘈喧巴閉？民主派嘅所謂領袖人物唔該用腦諗一諗，你地要為六四發聲，為李旺陽發聲，無非為了自由（言論與行動），站在呢個立場，任何有助於增加中國人民自由之措施（例如准許更多人來港旅行），真正民主自由派都唔應該反對，唔通深圳民工就唔值得有自由？
自由旅行係基本人權，左丁山歡迎更多內地人可以來港，無任何限制更佳。如果九月九日選舉之後，大多數立法會議員都反對自由行，梁振英不如向中央陳情，申請凍結自由行兩年，兩年後再諗。到時失業率上升嘅話，民主派民建聯上街示威要求重開自由行都似！行事無原則之政黨通常如此。