反洗腦大聯盟喺開學日發起全城黑衣行動反洗腦教育，演藝界唔少良心藝人，都決定企喺雞蛋一邊。CCTVB出晒名親政府，但《東張西望》兩位女主持陳倩揚同麥雅緻，噚晚就齊齊着黑衫做節目，獲網民激讚，佢哋做節目張相喺facebook短短兩個鐘就有三萬人like；而有線同now亦有多位主播着黑衫出鏡。
唔少打工仔着黑衫返工，但着校服返學嘅同學仔就要諗吓計，有同學將眼罩縛喺書包，象徵唔想俾人蒙蔽；有女仔就將個反洗腦標籤交俾書包上嘅巴斯光年，一樣咁搶眼。
着黑衫返學被記名
有同學仔喺facebook留言話，喺校服出面着咗黑衫返學俾老師記名，個老師仲要潑佢冷水話「咁少人做不如唔好做」，不過佢就覺得少人做好過冇人做。呢種態度同堅持，網民即刻勁讚，八方都俾個like你！