前76人巨星後衞艾華遜（右），早前出訪中國，送波衫畀球迷之餘，又同粉絲喺活動上隊啤，仲同佢哋搭晒膊頭影相玩親民㖭。佢仲同內地球迷話，中國係自己第二故鄉，有好多兄弟支持佢，希望可以打CBA回報班「巴打」。不過，37歲嘅佢親中嘅態度就好似令到美國同胞唔多滿意。點解？原來AI星期日應承咗人，會出席一場俄亥俄州舉行嘅街波賽；點知甩底去中國，主辦單位唔嬲就出奇啦。