話說四五年前，深圳人根本不知石鍋魚為何物，家陣，乜乜物物石鍋魚開到成行成市。不過講到正宗，就要嚟今日介紹呢間店試吓嘞。老闆娘是四川人，教埋你正宗食法：「燒熱個鍋先放魚片，再加熱湯底，無火灼熟即食。」 文、攝：中行線
踏入「渝魚香石鍋魚」，門口大魚缸最吸引我眼球，鯰魚、江團魚、水庫大頭同鱘龍極度生猛，八卦行近一望，點知水庫大頭一個擺尾，濺到我一身濕，正想劏佢嚟食，點知大廚話：「我哋全賣河鮮，鱘龍香港少有得食，試番條啦！雖然係人工飼養，但口感滑得嚟脆脆哋，好正㗎；再唔係試吓江團魚，長江流域先有，好肥美，滑到自動跣入喉嚨呀！」講兩講，老闆黃先生笑住出迎，大大聲話：「信我，食得石鍋魚，揀鱘龍最好味。」
金湯熬足五粒鐘
原來老闆娶咗個四川姑娘，所以傳到石鍋魚呢道菜嘅正宗做法。未幾，一個事先預熱嘅石鍋擺上枱，一股熱氣蒸上來，老闆教我食法：「石鍋本身已經燒熱至500℃，熱度可以維持好耐好耐，食法係先加魚片入鍋，然後加熱湯底，靠石鍋同湯底熱力灼熟魚片，全程唔需要明火，魚片會灼到剛剛熟，咁就唔會嚡，入口滑一滑，飲個湯仲正。」
見石鍋魚好賣，老闆再自創沙薑石鍋雞，同石鍋魚一樣做法，不過會先煮熟雞。「灼完魚嘅湯底，啖啖精華，有食客用埋湯底打邊爐，甚至帶番屋企淥麪。」湯底選擇方面，「食得辣嘅，可以試沸騰鍋，純四川口味，同麻辣火鍋不同之處係，沸騰鍋係湯，飲得落肚，麻辣火鍋係油，唔可以當湯飲；鍾意濃味嘅，必點金湯鍋，每日用30斤豬骨熬足五粒鐘，加咗南瓜茸，少少辣，越滾越味濃。」老闆：「信我，金湯鍋配鱘龍，沸騰鍋配江團魚，一定係最佳配搭。」
香港無嘅特色小菜
老闆係國內定居嘅香港人，熟識港人口味，亦從善如流，「好多港客叫我唔好獨沽一味齋賣石魚鍋，賣多啲特色小菜喎。」
望望餐牌，果然夠特色，好多小菜真係聽都未聽過，例如鵝肝醬鮮蝦，最正係個汁，用鵝肝打成，點蝦鮮上加鮮。又例如鐵板牛腸，牛腸好嫩，咬入口咇晒油，簡單用鐵板煎一煎再包錫紙焗熱，香到無朋友。再例如金沙豬頸肉，我哋食慣豬頸肉多數係一塊塊，呢度就炒到一粒粒，送酒一流。不得不試嘅仲有香辣牦牛掌，即係牛蹄，「呢道菜香港肯定無得食，要燜兩三粒鐘至完全入味，芡汁都係精華所在。」望落硬倔倔，不過我試過，又真係好軟腍，質感比豬手更滑嫩。
渝魚香石鍋魚
地址：深圳福田華強北振中路（四號路交滙）愛華電子綜合樓一樓（即地面）
電話：（86）755-83695140