容祖兒想搣甩「票房毒藥」呢個名，似乎都有啲阻滯。佢擔正嘅《DIVA華麗之後》，上映18日截至前日票房只係得390萬，唔出計仔都唔得——之唔係派飛益街坊囉！噚日記者發現鴻福堂個facebook，就有《DIVA》換票證派，網民只要答啱問題，就有機會攞飛，不過有網民留言話免費都冇興趣睇喎。
變態購物狂
至於另一毒藥張栢芝嘅新戲《河東獅吼2》仲慘，套戲喺香港上咗4日，至前日為止只收11萬，反而彭浩翔執導嘅《低俗喜劇》越戰越勇，由9號上映到前日票房已迫近2,700萬，認真犀利。
另外，祖兒、古巨基、呂方同關心妍（Jade）等，前晚喺將軍澳電視廣播城錄影賀國慶節目，祖兒成日參加國慶演出，係咪諗住有助打入內地市場？佢話唔關事，只要有時間就演出。提到陳奕迅之前個唱網上有門票炒賣，結果有fans被騙，佢都叮囑fans要小心。講到上網買嘢，祖兒話以前會揀好想買嘅嘢放入購物車，不過純粹滿足，最後係唔畀錢：「自己唔知係咪心理變態，不過家唔會隨便買嘢。」