「我係呃你，但呃你一世」Playboy要呃女仔，都要袋定一兩句甜言蜜語傍身！家CY擺明呃班學生接受國民教育，連大話都費事講，淡淡然反問：「指引哪一個部份有問題？」曲線話你聽「學民思潮，我當你冇到！」
梁班子從來是雙重標準，上星期一聲下令，置安心即時夭折。林鄭說國民教育係前朝遺物，傾咗好耐，「唔係石頭爆出來」，所以一定要推行；但置安心何嘗唔係前朝遺物，傾咗好耐，仲要係林鄭做發展局局長時，有份策劃嘅。何解政府對待置安心就話要因時制宜，從善如流；面對具爭議嘅國民教育，反而要擇「善」固執？
有陰謀論話CY為咗同學生爭報紙版面，於是突推「梁十招」，仲「順應民意」將「一簽多行」煞停3星期咁大把。3星期後，立法會選舉已過，班建制派坐定定，到時CY可玩嘢再推「一簽多行」，零售股或再炒起。目前佐丹奴（709）沿上升通道行，20日線升破250日及50日線，形成黃金交叉，短線上望6.50元。
Fifi
本欄逢周二、四刊出