一吋長一吋強？南非「刀片跑手」比斯托利斯，喺今屆倫敦殘奧力爭衞冕3個單項冠軍，點知喺第一關周日200米T44級決賽就出事，臨尾畀巴西嘅阿倫奧利華拉超越屈居銀牌。比斯托利斯賽後好唔忿氣，大鬧賽會任由啲跑手加長「刀鋒」所以先會輸。好在佢瞓一覺冷靜落嚟之後，都知道自己講錯嘢，就言論作公開道歉。
200米跑臨尾香
25歲嘅比斯托利斯喺04同08年殘奧都贏到200米T44級金牌，今年仲威到出戰埋倫奧男子400米賽事，順理成章到今屆殘奧被視為頂頭大熱。刀片跑手喺上周六嘅預賽以21秒30刷新世界紀錄，嚟到周日決賽，似乎無人估佢會甩拖。
比斯托利斯喺決賽一路領先，但去到距離終點50米左右情況有變，阿倫奧利華拉一步步逼近，最後以21秒45首先衝線；比斯托利斯以21秒52衞冕失敗。
輸咗金牌比斯托利斯極為唔順氣，賽後話：「我跑得好好，但IPC（國際殘奧委會）一直都忽視跑手義肢過長嘅問題，好多人都比一年前突然『高咗』，家係進行緊唔公平嘅比賽。奧利華拉係偉大嘅運動員，但要喺最後100米追番落後8米嘅距離，實在太荒謬喇！」
為「過長論」道歉
奧利華拉就一於少理，仲作出反擊：「對好多人嚟講比斯托利斯係不可擊敗，外星級嘅跑手，但我今日證明凡事都有可能。我一直視佢為偶像，但佢賽後嘅言論實在令我好失望。我都有苦練過，並唔能夠將焦點放喺義肢上。」
事隔一日之後，比斯托利斯亦意識到言論太過火，喺周一作出道歉：「我為噚日喺唔適當時間作出嘅言論致歉，完全冇企圖去淡化其他運動員奪冠嘅光榮。當然，我堅信（義肢長短）呢個始終係要處理嘅問題。」雖然唔能夠喺200米3連冠，但刀片跑手仲可以力爭衞冕100米、400米同接力賽事，希望佢可以繼續努力跑出佳績。
比斯托利斯6件事
1.在11個月大時因腓骨畸型進行雙腳截肢手術。
2.其父母為他寫上一封信，解釋讓他截肢的原因，對他作出鼓勵。
3.在兩歲時首次接上義肢。
4.在中學時代，曾參加過水球、欖球、木球、網球、三項鐵人、摔跤以至拳擊運動。
5.長期參與欖球令膝部勞損，接受醫生建議改攻跑步。
6.手上有其母親出生與去世日期的紋身。
資料來源：《蘋果》資料室