2012年8月30日，特首梁振英與發展局局長、運輸及房屋局局長張炳良一齊召開記者招待會，宣佈十項穩定樓市措施，史稱「梁十招」。
2002年11月，香港房地產市道低迷，樓價自九八年起連跌五年，好多香港人成為負資產階級，不少業主燒炭，不願坐困愁城者則上街示威，要求政府出招阻止樓價繼續下瀉，市面上一片愁雲慘霧，於是孫明揚局長宣佈，取消拍賣土地一年，暫停勾地，暫停地鐵及九鐵房屋項目招標，即時結束房屋計劃，結束夾屋，終止出售公屋……
孫九招主要從收縮供應着手，落藥頗猛，次年2003遇上沙士，樓價跌至谷底，2004年開始有自由行，帶旺市道，從此樓價爬升，飆升，狂升至今，當時左丁山話特區政府托市，政府死都唔認，歷史自有證明。
睇吓數字，從1993到2002呢十年，私人住宅物業落成量每年平均有26,318個單位，之前十年，1983-1992，平均每年有30,232個單位，過往34年（由1979計起），最多一年係1989（36,520個單位）。出咗孫九招之後，2003-2012，平均每年供應量急降至14,250個單位，比起1993-2002，少咗46%，而人口不斷增加，經濟復甦，加上史無前例之自由行，再有利率不斷向下走嘅情況，盲嘅都睇到房地產市道必然上升。你話點解曾蔭權自2005年上台後，點解睇唔到，點解唔喝停孫九招改變土地政策，改為增加供應？木宰羊。睇吓數字吖，彭定康時期（1992-1997），私人住宅落成單位總數有148,700，平均每年21,243；董建華時期（1998-2005），總數有210,460，平均每年有30,065；曾蔭權時期（2006-2012），總數有77,740，平均每年只得11,105。家明白未？董特首時樓價跌，曾特首時樓價大升，彭港督時期，樓價逐步走上97高峯。
過去十年因孫九招威力太大，供應大幅度減少，如樓市要恢復平穩，回復1996年之前嘅穩步上揚狀態，私人住宅單位供應量要回到大約三萬個或至少二萬五千個以上，幾難咯，梁十招冇孫九招咁劍及履及，火力不足，恐怕幾難將孫九招造成嘅局面扭轉。單從未來五年預測供應量睇，樓價還是看升！