最失運：紅鑽
日聯點題3支球隊，山葉不敗、飛腳繼續大；點知紅鑽全場狂攻松鼠，只係對手完半場前一次突擊（亦幾乎係全場唯一一次有威脅射門），就被搞掂追和，熱W倒灶。呢粒鑽有form，今場欠運而已；同日維加泰殺低前鋒，下場（15日）要作客三箭合演榜首大戰,；第3位嘅紅鑽坐山觀虎鬥，家冠軍賠率冷至6倍，小弟信心仍在。
勿氣餒：黑池
前晚英冠尾場大戰，結果主場一向硬淨嘅李斯特城，1球波搞掂咗作客嘅黑池，後者輸都仲可以喺榜首嘆兩個禮拜至國際賽期後。今場勢均力敵，中後段客軍擲晒兩個一老一嫩菲臘斯出嚟攻，無法追和；隊波保留大部份上屆人腳再爭升班，新星冇被撬走，計合作性，季初起碼仲可以睇高一線。
莊家最錯：樸茨茅夫
第一輪講過正牌莊家唔知係咪睇唔通定冇吉士，冇為呢支新埋班、淪落英甲嘅球隊開盤；結果莊家睇定咗後嗱嗱臨開番，班波計埋上周六主場負奧咸熱W倒灶輸埋，開季錄得2和2負，莊家太迷信佢哋嘅主場喇，有開錯盤之嫌；其實大部份球員新加入兼只簽了一個月短約，純靠鬥志堅持下去，一日唔確定有新老細入主揼水維穩，都幾牙煙；希望莊家繼續開盤繼續錯落去，波友吼到好賠率咪有福咯。
有排執：昆士柏流浪、熱刺
昆士柏流浪新埋班大換血，作客繼上季尾後，今次輸畀曼城兩粒，好正常；不過前晚深夜睇，踢得又算有板有眼，格尼路打中間幾有台型，拍落朴智星唔算太差，宜繼續留意。相反熱刺大執後，踢得仲係幾核突，主場對隻金絲雀諾域治都冇霸氣，開唔到齋；隊波又惹飛，追佢哋嘅波友索晒氣。波帥（圖）趁呢兩個禮拜空檔期相信會龜縮思考人生，點解喺英超教波仲係咁失敗。痛苦程度，會不下於我哋嗰位教育局長吳先生。
蘋果波神