一班中學生，為咗反洗腦而絕食，成班高官竟然鐵石心腸，唔當一回事，夾硬今日如期開始向學生洗腦，好彩仲有唔少政界中人有良心。好似曾經去探訪過絕食學生嘅余大狀咁，見到班學生咁都痛心疾首，日前佢喺港台新界西論壇上，含淚呼籲撤回國民教育科嘅短片，更加喺網上瘋傳，一日已經有接近萬幾二萬個like，可算今年選舉論壇最難忘場面之一；而佢反駁對手何君堯，無厘頭將國民教育扯到去盧旺達好多災民嘅嗰一節，亦獲得唔少網民擊節讚賞。