台灣藝人林志穎眾所周知一向最熱愛係玩賽車，但估唔到原來佢都好熱捧新科技，前晚佢就喺微博貼相自稱攞住最新嘅iPhone5嚟試玩，但係最奇怪係iPhone5根本未正式公開發售，連蘋果都係要下星期先搞記者會公開部機嘅真身，點解林志穎咁快有新機喺手？
網上有假貨
結果林志穎呢個微博一出，直到噚日下晝已經有超過15萬人轉發佢張相同留言，另外再有過3萬個評論，反應相當熱烈，梗係喇，林志穎可能係全球第一個可以率先試玩iPhone5嘅藝人，唔怪得引嚟咁多關注。林志穎喺相中唔止攞住部手機試玩，仲多角度影相，佢留言話：「今天證實iPhone5的確變得更長，並採用與iPad相同的鋁合金材質，同時也因採用4吋螢幕，厚度更薄，但我覺手感差不多……」
但究竟林志穎部手機係點嚟同埋係咪佢，佢喺留言就冇交代，但亦有網友話其實網上早有假嘅iPhone5，唔知佢攞住嗰個係真定係假？林志穎嘅經紀人葛靜琪噚日表示：「目前聯絡不上林志穎，無法取得他的回應，從他寫的內容來看，他並未說自己有iPhone5，寫的都是媒體報道過的內容。」答案認真模稜兩可。
