今屆美國網球公開賽已經打咗近一星期，各大熱門球手大致上都順利過關，當然包括今年越打越好嘅費達拿。呢位頭號種籽喺上周六男單第3圈賽事，冇大壓力下直落3盤擊敗西班牙嘅華達斯高。費天王晉級16強之後，未諗點應付跟住嘅比賽，反而話好掛住因傷冇參賽嘅拿度，希望佢可以喺今年內復出再較量吓，唔通無敵真係咁寂寞？
「我哋之間冇秘密」
賽事喺攝氏32度高溫下進行，但對於費達拿嚟講就唔係太大問題，華達斯高全場只有一次破發分機會，結果費天王以6:3、6:4、6:4過關躋身16強。雖然迪祖高域喺近兩年快速冒起，但講費達拿職業生涯最大對手，就點都係西班牙嘅拿度。呢位7屆法網冠軍自從喺6月溫網爆冷次圈出局之後，就一直因膝傷冇再打比賽，先後缺席咗奧運同今屆美網賽事。
近日再有消息指拿度傷勢康復情況唔多理想，可能會再錯過台維斯盃同埋年終賽，到2013年先至可以復出。
對於老對手嘅情況，費達拿回應話：「我對於呢個消息唔感到意外，但都希望佢可以盡快復出，喺今年之內再打波。每位球員嘅身體受傷情況係好私人嘅事，一般都唔會同其他人講，但我同拿度就無所不談，大家之間都冇乜秘密，因為我哋都知道對方唔會爆出去。」
梅禮料拿度強勢回歸
喺過去30次大滿貫賽事裏面，佔24次係由費達拿或者拿度贏得，而費達拿亦希望可以成為87年嚟第一個6次喺美網男單封王嘅球手。費天王下一圈嘅對手係美國嘅費殊。同拿度一樣，費達拿都曾經遇上低潮，但喺今年就全面回勇，喺2012年已經贏過包括溫網在內6次錦標。
費達拿輕鬆打入16強，3號種籽梅禮喺同日第3圈賽事同樣對住西班牙球手就贏得驚驗啲。呢位英國球手同洛比斯交手贏3:1，當中3盤都係打到決勝局先險勝。梅禮亦有寄語支持吓拿度：「我肯定拿度會以更強姿態回歸。佢以往未試過因傷唞咁耐，但每次傷癒回歸，都會有好好嘅表現。」