鍾意聽Live的朋友，上「Angel Baby」玩必然唔會失望。呢度裝修美侖美奐固然吸引，最正係位位歌手都係巨肺，唔敢話繞樑三日，但保證聽出耳油，以音符激活氣氛，這個場做到了。文、攝：米酒
「Angel Baby」淨係門口都型仔過人，喺紅橙黃綠青藍紫各色燈光襯托下，遠望歐洲古堡，而室內佈置亦以西方宮廷式設計，牆上掛滿一幅幅油畫，一盞盞大吊燈下係歐陸懷舊梳化。大堂位置擺高枱，埋牆四邊有舒服卡座，側邊仲有個大飾物櫃，精緻擺設多不勝數。
當晚，我九點幾到場，已經七成滿座，所以要玩真係要早到，好彩都俾我坐到個對正舞台嘅靚位，Order番杯藍色幽靈慢慢啜，啜啜吓，隔籬枱忽然傳嚟嘩嘩聲，原來Bartender玩杯叠杯放火，嗰幾杯「林寶堅尼」，聞都聞到勁重酒精，自問飲得嘅，不妨一試。
另一重要發現係，呢間場九成客人都係深圳女，尤以斯文OL居多，唔少係三三兩兩坐埋一枱，無任何雄性動物黐身，咁當然，抄唔抄到牌要睇你本事嘞。Hea到十點幾，酒吧開始聚人，唔使幾耐就全場爆滿嘞。踏正十一點，剛剛啜完杯Cocktail，音樂響起，射燈全部聚焦舞台，女歌手準時出場，打個招呼就開始獻唱，經理同我講：「我哋搞好多Function㗎，剛剛過去嘅八月三十號就有謝芷蕙嚟開Show。」Sorry，恕我見識少，邊個係謝芷蕙？「Cammi呀，喺香港都幾出名㗎！」哦！……係，佢喺香港確實出名──好笑。
講番正題，呢間酒吧音響唔錯，唔會一味靠大聲，吠到你耳聾。女歌手非常巨肺，聲底好厚，唱中英文歌都有一手，唔賣花巧，亦唔以着得少布吸引人眼球，用心唱，唱得好，就自自然然多掌聲。想聽有質素嘅Live music，嚟呢度一定唔會失望。
Angel Baby
地址：深圳市福田區華強北中航北路華樂大廈1樓
電話：（86）755-28307788
收費：啤酒半打¥260，大酒¥600