【中環】
今年初位於廣東道嘅意大利品牌DOLCE & GABBANA擅將公眾地方劃成禁止港人拍攝區而引起公憤，估唔到事隔半年，DOLCE & GABBANA竟又因為內地女星范冰冰喺店內濕平而人肉阻擋記者影相。
男職員人肉擋路
范冰冰前晚喺香港出席活動，佢下晝嚟到香港之後，即刻把握時間同女助手去中環瘋狂購物。前日下晝四點半，記者發現戴住黑超嘅范冰冰喺歷山大廈嘅DOLCE & GABBANA睇衫，於是喺舖頭外面影幾張相，點知舖頭一位男職員見到，即刻喺舖頭入面人肉阻住記者影相，記者行去邊，佢就阻到去邊，前前後後阻咗兩分幾鐘。後嚟另一職員出聲叫個男職員唔好阻，個男職員先至放棄行開。
范冰冰之前已經喺舖頭揀咗一批衫，佢逗留至四點半就離開，由助手幫佢挽住大袋戰利品，之後佢哋上咗部中港牌嘅七人車離開。
採訪、攝影：李志明
