近期接連襲港嘅NBA旋風，隨噚日朗度喺修頓出席完Red Bull King of the Rock後而完結。但大會安排欠妥，堂堂塞爾特人球星一入到場，球迷就好似無掩雞籠圍住入口等佢簽名，仲一路跟佢入到場中央，難怪朗度用「crazy」嚟形容香港球迷。
King of the Rock 1 on 1港、澳區選拔賽吸引到一千多名入場球迷，9成為睇朗度，比賽1點展開，朗度4點幾到比賽嘅4強至現身。雖然事先張揚冇籃球表演，但朗度都好識做，即場玩吓花式籃球，一時轉波、一時又胯下傳球，自得其樂。選拔賽決賽，港隊代表方誠義連過6關，最終奪得本月20日飛到美國打決賽嘅資格，佢大讚朗度冇架子；今日返美嘅朗度臨走前仲話：「香港好似紐約，人多車又多，呢幾日喺香港好享受。」