向外滙Ｃ請教LIBOR、HIBOR每日早上訂價之事，真係聆聽有益，起碼可以update吓，唔好咁背。左丁山做銀行之時，邊度有人調查HIBOR Fixing㗎，講笑咩，當年滙豐與恒生控制大局，有最多港元存款剩餘，外資銀行一定要向佢地借頭寸，第一口價就係「訂價」，冇得拗，依家係點呢？外滙Ｃ話比較客觀化、科學化，金管局要求銀行記錄低，交易員簽字，上級批准喎，聽落去其實又係官樣文章，徒然增加內部行政費用與管理時間。金融市場最現實，我有大把頭寸借出拆息市場，就係我話事，你要拆借週轉，有乜資格阿吱阿咗？唔鍾意咪唔好借囉。
外滙Ｃ話自從安隆事件後，有2007年次按危機，2008年金融海嘯，及而今之歐債危機，連串打擊之後，基本上國際級銀行誰也不信誰，六個月以上的「長錢」，幾乎係閒人免問，所以早上LIBOR訂息之前，嚴防對手風險，六至十二個月嘅LIBOR根本冇乜市場資料（市價）可以參考，息價純屬係educated guess，真實成交亦少，啲監管當局要調查嘅話，好難查出一個所以然。
唔講咁悶嘅事，問外滙Ｃ最近如何搵銀？佢笑到四萬咁口：「近月唔講搵銀，最緊要乖女搵到好大學，好學系，佢係第一屆文憑試考生，考到四科5**，四科5*，入咗港大環球商業系呀，哈哈哈……」
嘩，笑得咁開心，好難怪嘅，全港考試尖子都話要讀環球商業系，都唔知有乜咁巴閉，今年ibank不景，裁員不斷，讀呢系嘅學生個個望入ibank，怕要降低吓期望嘞，但外滙Ｃ話：「我都冇期望，乖女唔做ibanker仲好，但係讀環球商業系有大把機會出外學習、交流，增廣見識，exposure多好多嘅，以後佢做邊行都有優勢！」說得不無道理，左丁山知道今年A-level（高考）有四人考到6A，十三人考到5A，共十七人堪稱高考狀元，其中十一個對記者講話要讀環球商業，香港做乜科技港吖！話呢系嘅學生多exposure，合乎事實，今年中大新生在校園搞O-Camp，唯獨是中大環球商業新生會飛去日本大阪參加O-Camp與歐美新生滙合，真係聲勢零舍唔同。