新世界百貨（825）銀彈夠多，又有大孖沙大股東，有得諗吓。新百貨上年尾揸住現金42.5億銀，貸款得10億銀，淨現金高達30億銀，而大股東又係新世界發展（017）。新百貨有大把銀彈，加埋老牌超級實力大股東，兩個字：「穩陣」。又新百貨家陣PE 8倍幾，但當中，就反映埋2011年度所計入嘅非業務性收益4億銀。就當新百貨2012年度純利keep住喺2011年度8億銀左右，預測PE照舊係呢個水位，一啲唔貴。嚟緊日子，隨住樓市調控期一過，加埋阿爺放水，新百貨食住新一輪內需潮，應該肥仔水。新百貨近三年嘅「長城鋼價」喺3.7元，呢轉個市風雨飄搖，新百貨再跌，吼實呢個位兜底，以預期10倍PE做目標，要見5蚊，回報率35%。
麗展價殘追落後
麗新發展（488）最新NAV0.64元，現價（0.139元）折讓高達78%。本地磚頭股當中，麗展有咁嘅折讓，流晒口水。又呢期香江樓市繼續癲狂，麗展呢段日子，亦繼續有住宅出售，食住呢個火燙潮，應該肥仔水，NAV有調升空間。呢轉買落後，短打麗展，係咁意博升20%到0.17元，折讓仲高達74%，唔係好過份。錢雋