昨天記掛着今天的稿件，瞓醒了故事都自己跑出來了，紅軍前鋒安祖卡路爾正式由韋斯咸借用一年，明明說沒有興趣來小球會的，沒有期望所以有點意外驚喜，雖然不可能再單純的相信，每段撮合的恩緣都是兩情相悅的，不知有沒有一些老牌槌仔的黨球迷會懶有態度扮勁說：「盲婚啞嫁我唔稀罕！」反正都冇人話要嫁你，借用一年啫，一年後卡路爾仍可以大好前途返利物浦，又或加盟其他大佬，不過到時可能連韋根都話要打地波，柱躉式中鋒不幸地被唾棄了。做正經嘢前，通常都要做啲唔正經嘢，執筆之前的唔正經，就是上facebook留下了一張卡路爾新鮮熱辣的韋斯咸上身照，室內的、強顏歡笑的，可見是某些寒酸的韋斯咸線人，急不及待在簽約現場強行製造第一手獨家發放，「你們大家拿去share吧！招人妒忌吧！」如此的鄉下仔心態，我好buy囉！不過如果有得揀，我確實對你哋利記另一成員更有興趣，不是祖高爾這反骨仔，是你們的新任教頭羅渣士；年輕冇乜銜頭好合理，但教大會都夠膽堅持自己的信念，有日佢真係能夠將利物浦史雲斯化的話，利記的上一代粉絲將會大叫祖宗有靈，皆因利記七、八十年代就係好似巴塞咁響地面打橫行嘅，既是球會傳統風格，亦係今天世界大勢。羅渣士係能夠為利物浦帶來未來的人，唔似得上一手杜格利殊威水極，都係只能夠將利記留響過去的人！卡路爾就係佢上一代品味嘅好收購。利記若果能夠容忍羅渣士留隊兩年，相信成績就會出現，之不過大家忍唔忍到咁耐就好難講。其實呢，韋斯咸以前都係打地波㗎，仲幾有風格㖭，不過大sam當道，連卡路爾都來了，咁我哋就一齊old school的玩高Q大腳吧，收筆之際又上網睇留言，卡路爾玉照引來其中一個回應係「我哋唔使怕降班啦！」唔使打告急牌了嗎？來日方長呀。文：keymannow TV主持mailto:[email protected]