英皇前小花何嘉莉前日榮升龍媽媽，一索得男，由「生仔聖手」何永超開刀誕下6磅7安士B仔，暫改了法文名Jean。嘉莉透露與夫婿升呢做父母，感覺依然唔真實，不過全家上下都表現興奮。小Jean鼻子高高，嘉莉笑言似爹哋，表情十分生鬼。
英皇前小花何嘉莉轉戰時裝界，加上陀龍B雙喜臨門，昨日早上在微博宣佈：「寶寶昨天出生了！重6磅7，感恩感恩。」還上載了BB的肉照，鼻子長得高高，十分精靈。何嘉莉前日在中環嘉諾撒醫院開刀生龍B，由有「生仔聖手」之稱的名醫何永超操刀，夫婦二人暫為小B仔改了法文名Jean，中文名則尚未有定案。
黃家第一男孫
何嘉莉昨日向記者報平安，心情難掩興奮：「好興奮，老公同我都覺得好唔真實！老公有入產房，同有份幫手剪臍帶，其實冇特別擇日子生，日子都係自己定嘅。」問到嘉莉的身體狀況，她表示：「依然好攰，傷口仍然好痛，所以未決定餵乜嘢奶。」嘉莉表示小Jean係家中第一個男孫，全家上下都超興奮。問到囝囝樣子似邊個，她笑言：「BB鼻、嘴都似爸爸，眼睛未知似邊個，因為剛出世，相信遲啲個樣會再變得明顯啲，精緻啲。不過BB已經好多表情，好生鬼！」
陳柏熹探BB
何嘉莉06年告別娛樂圈，下嫁甜品店太子爺黃逸璋，婚後修讀藝術課程，今年更與Moiselle太子爺陳柏熹合作，開了名為dour studio的時裝店，昨日陳柏熹到醫院探小Jean，還急不及待將照片放上微博，分享喜悅。
撰文：李全