俄羅斯美女舒拉寶娃上周五喺美網第3圈以盤數2:0，擊敗美國球手柏蒂輕鬆過關；賽後喺記者會突自爆，同籃球員男友禾積斯因聚少離多，而解除婚約和平分手。舒娃結唔成婚，惟有專心比賽治情傷啦！
舒娃用咗58分鐘就搞掂咗對手，以為佢會喺賽後講比賽嘅嘢，點知佢突然話自己已經同家效力土耳其球隊Anadolu Efes嘅禾積斯分手。個個即時問究竟發生咩事，呢位倫奧女單銀牌得主話：「我真係等緊人問我呢個問題㗎，不過冇人直接問喳嘛。」舒娃係記者嘅寵兒，大家咁憐香惜玉，又點會向你傷口灑鹽呢？
贏法網前已斷3年情
今年25歲嘅舒娃又話：「對於我哋兩人嚟講，今次真係一個好困難嘅決定。」聽佢咁講，應該係兩人和平分手。佢仲話兩人喺今年春天已分開，唔怪得禾積斯亦冇喺Twitter公開為贏得法網冠軍嘅女友祝捷啦，估計兩人好可能喺法網前經已玩完呢段3年感情。舒娃亦好有風度話再見亦是朋友：「我哋都好尊重對方，大家仲係朋友，呢3年真係好開心。」
與禾積斯常變分飛燕
舒娃亦有為點解分手而解畫，主要原因係二人太少時間見面。16強將會對同鄉柏杜娃嘅舒娃話：「因為我要飛嚟飛去，令到我哋兩個好難見面。尤其是佢去咗土耳其搵食之後，唔可以成日離開，情況更甚。一年有10個月要留喺嗰邊，都返唔到屋企一次，關係好難維持。」
本來舒娃同禾積斯定咗今年11月結婚，家突然分手，令到大家都覺得好惋惜。2010年訂婚嗰時，效力過湖人同網隊嘅禾積斯，仲送咗一隻有成8卡鑽石、值25萬美元（約200萬港元）嘅訂婚戒畀舒娃。問到結唔成婚嘅心情，舒娃就話：「唔緊要，仲有機會嘅，我仲有大把時間。」傾慕者，聽到仲唔開始攻勢？