臨海、水深，若當年英國軍艦略為駛偏到深水埗泊岸，歷史得重寫。如今揹上髒老亂窮四宗罪，門外看三山五嶽，實地走一趟，這裏有性格、具活力、重情義，絕不怒火街頭。 撰文：蔡俊業 攝影：潘志恆、林栢鈞、蔡家輝
趙銘裕
27歲，區內茶餐廳太子爺；職業舞蹈員，曾在莫文蔚等演唱會演出
最掛住海景！
深水埗變咗，我講個海！出世住李鄭屋，幾歲大搬去南昌邨，當時未填海，屋旁係碼頭，望到對面海，新年睇到煙花，暑假無聊就伏喺窗台望海發呆。家？同維港越嚟越遠，窗口只望到奧海城同圓方！好在，呢區仲有好多嘢無變，包括我老竇開嘅茶餐廳，落舖食嘢，會見到客人同隔籬枱打招呼，舖頭老闆之間會傾吓近排生意行情。同埋，呢區無百貨、商場同大超市，我老竇買米買菜做生意，就要去唔同檔口，所有人都為生活走來走去，好有活力！呢區交通亦真係好方便，將來就算搬出嚟住，都會住番呢區！
邵美君
39歲，21屆香港舞台劇獎最佳女主角（喜劇/鬧劇），深水埗區出世長大
越窮越有毅力！
以前一家十口住大南街，做跌打師傅嘅老竇脾氣躁，成日打鬧我，喺呢區留低咗童年陰影！大個之後，最驚行過南昌街休憩公園，因為嗰度有好多精神有問題、遊手好閒嘅人逗留。93年搬離呢區，有好幾年逼自己返嚟面對，去舊屋，去公園，去望吓嗰啲人，恐懼感先漸漸消失。講到玩，有次我哋最細嗰四兄弟姊妹將全屋啲紙搣晒出嚟，摺咗400架紙飛機，摺到凌晨三、四點，然後飛晒落大南街，真係好Hyper，朝早清道夫見到，即刻爆粗！係，呢區係窮，但世事永遠相對，越窮就越有毅力，用盡力量去爭取，令人進步。至於我，亦因為窮，但又鍾意藝術，所以結他、畫畫都係自學，亦因為喺呢區見過太多邊緣人，成日諗點解佢哋會變成咁，有種好想了解嘅慾望，令我可以演到唔同嘅角色。
鄂劉寶添
72歲，主婦，蘇屋邨原居民
好似住四合院！
申請公屋，頭兩次畀蘇屋邨我都唔啱心水，最後一次畀綠柳樓，當時老公每月人工得二、三百蚊，租金要$92，但200幾呎，有露台，望到山頂，一家五口獨立成家，好過買樓，一住就42年，08年先搬走。好懷念舊陣時，樓上樓下都識，互相關照，好似住四合院咁；熟成點？班細路放暑假，三、四十人，你準備豬扒，我煲腐竹糖水，沿壽菊樓行上山，經華爾登酒店、柏立基教育學院去馬騮山燒嘢食囉！
彭煒城
37歲，黃金電腦商場IT店老闆
黃金快人兩個月！
94年開始喺呢區工作，咁就18年，由砌機到家賣配件、手機，黃金、高登同新高登三個場我都做過。2003年沙士後，趁平租自立門戶，同大舖爭生意，結果蝕錢，諗諗吓改賣mp3機、USB，幾乎全場獨家，生意倒賺七、八成！深水埗賣電腦產品出名快，比其他區至少快兩個月，外面得4TB Harddisk咩？我哋去到6TB；VGA Card人哋256，我哋512，CPU又快、機殼款又多。想砌機，一定去黃金！
施麗珊
42歲，香港社區組織協會（SOCO）社區組織幹事
24小時都有人擺檔！
表面上呢區窮、舊，衞生差，落區耐咗就會發現呢區好多舊樓好有文化特色，北河街、桂林街小販井井有條，仲有天光墟、天黑墟，24小時都有人擺檔，無論幾舊嘅嘢都會有人買，幾殘都好，照用，反映街坊自力更生，捐窿捐罅都係想靠自己，而唔係諗住攞綜援。