兩個月前的NBA總決賽，杜蘭特（KD）領軍的雷霆不敵以勒邦占士為首的熱火，與人生首隻冠軍指環擦身而過。KD昨午結束香港之旅前，在灣仔修頓上演一幕「復仇記」，面對外號「占士」的本地甲一球員陳翊麟上籃，即場示範封阻，之後還在2,000觀眾面前，表演3分和入樽騷，high爆全場。
訪港之旅最後一日，KD率領由Nike League球員組成的明星隊，火併本地甲一球員聯隊，全場座無虛席，「粉絲」不停大叫「KD，KD！」；首兩節尚未現身的KD千呼萬喚始出來，第3節出場不久，在欠缺足夠熱身之下射入一記3分球「穿針」，作為給香港球迷的見面禮，令現場情緒進一步升溫。
3度入樽摘下18分
負責盯緊KD的南華球員陳翊麟，施展渾身解數做好防守，奈何擅長遠距離投射的KD，球技和速度均勝一籌，再入3球3分，更3度入樽；包括接應小將陳兆榮恰到好處的傳球，大玩「拆你屋」，僅上陣兩節就輕鬆射入全場最多的18分。
港版「占士」都有一次show off機會，最後一節在籃底上籃，卻被回防的KD施展一招教材式飛身封阻（圖），引起全場一片哄動，結果KD帶領的明星隊以62:56獲勝。「占士」形容感覺一世難忘，「打遊戲機都會選用KD，現場和他對賽，覺得他好『屈機』；3分球和入樽都好輕易就做到，自己已盡力做好防守，但他的技術的確是高一個層次。」
陳兆榮獲KD大讚
有14分進賬的陳兆榮當選MVP，更獲KD公開點名稱讚，他笑說：「自己第1次交出一球『拆你屋』，結果由KD入波，非常開心。雖然只是一場表演賽，但KD的態度都好認真，沒有hea打。」
KD來去匆匆，只逗留約半小時離開，他不忘勉勵本地球員要認真對待每場比賽，昨午4時乘坐飛機，返回美國準備新球季。本報訊
《花絮》 KD拋戰鞋益小二生
KD貫徹親民形象，臨走前即場除咗自己對US17號超大碼籃球鞋，拋上觀眾席益街坊。升讀小二嘅梁小朋友就好好彩搶到，佢原本最鍾意林書豪，不過攞到KD戰鞋後就話下季會力撐雷霆，隻鞋就會收喺睡房衣櫃度，唔會畀任何人摸。
波衫送弱勢社群
KD喺修頓送波鞋，又送簽名籃球，吸引唔少粉絲去搶。佢對弱勢社群都好關懷，活動尾聲嗰陣，特別邀請長期患病而要坐輪椅嘅張小朋友一齊影相，仲親自送咗件簽名波衫畀佢，到張小朋友笑到見牙唔見眼，話會帶埋件衫返教會同教友分享。
大電視饗山頂客
灣仔修頓觀眾席出晒名夠窄，噚日又全場爆滿，看台有啲位視線難免會受阻，大會就非常識做，喺球場兩邊各擺一部巨型電視螢幕，畀坐喺山頂位嘅球迷，可以舒舒服服睇到KD嘅廬山真面目，真係抵讚。
dancers走入場夠蝦碌
NBA中場休息嗰陣，都會有dancers（圖）走入場跳舞搞搞氣氛，大會噚日亦請咗約20位dancers助興，不過就出現蝦碌鏡頭。有dancer誤以為比賽進入暫停，嗱嗱聲走入場中表演，點知行咗一半先知道搞錯咗，結果要急急腳避開場上嘅球員，走返出場邊，場面都幾搞笑。
