今次選港姐送名車搞到一鑊粥，噚日無綫喺電視城舉行記者會，外事部副總監曾醒明講述送兩架合共97萬嘅Mini Cooper方法，由噚晚8點起至聽晚9時15分，觀眾可上tvb.com同tvb fun網頁登記，答中一條問題就有份抽名車，曾醒明話：「抽獎係喺星期日晚上10時45分同11時35分兩個廣告時段現場直播進行，如果觀眾15秒內唔聽電話，就即刻抽另一個。先送49萬嘅車，之後送48萬，當晚全程錄影，呢個系統安全可靠，如果咁唔好彩一個都抽唔到，我哋會錄影整個抽獎片段安排喺周一嘅《東張西望》播出，以向公眾交代，而下星期一，三位港姐會去得獎者屋企頒車匙。」不過，噚晚8時TVB Fun已可接受網民上網登記抽名車，但記者試過網上版未能連結網頁，手機則順利登記。
至於TVB就委任咗羅兵咸永道公司對一人一票選港姐搞到down server一事作出調查。
此外，now喺facebook搞嘅港姐投票，朱千雪以70%大比數成冠軍，亞軍黃心穎得亞軍，張名雅季軍。無綫見過鬼唔怕黑計劃一人一票選歌王歌后外，今年《萬千星輝頒獎典禮》都一人一票選視帝視后，噚日無綫高層余詠珊話：「我哋係有咁嘅計劃。」