要數娛樂圈愛車藝人,天王郭富城必入三甲,他不但購入多部名車,十多年前更開始接觸賽車,做個真正車手。在舞台表演永遠追求完美的他,對賽車同樣落足十成功力,今次參加Audi R8 LMS盃內蒙站,城城更在第六回合勇奪非專業車手組亞軍。成績相當不俗,但他自言與賽車相逢恨晚,甚至話將來有小朋友,希望他十幾歲就能玩賽車。 記者、攝影:悠樂長
訓練班買第一部二手車
談「郭富城與汽車」,實在有太多想問,例如坊間盛傳擁有無數靚車的他,將愛車存放在一個車庫中,並有專人啟動引擎保養、悉心打理!亦有傳Aaron通常只喜歡揸某一部車,與朋友去打邊爐等等。不過,由於Aaron身份關係,不便直接談及汽車品牌,所以今次都係談賽車吧。一講賽車他即滔滔不絕,「我跟好多男士一樣,受到汽車卡通片的影響,令我由細到大都喜歡玩車。」而Aaron人生第一部汽車,就是他在無綫訓練班的年代,因住家和公司路途遙遠,便隨便買一架二手車代步,到底係咩車他都不願一提,只說:「內裏有曱甴,都不知從哪裏走出來!」城城曾經認為賽車是遙不可及的事,但越遙遠他越想接近。自從96年鄰近香港的珠海賽車場啟用後,已有經濟能力的他便踏出賽車第一步,學習方程式賽車。
升級參與大馬力賽事
Aaron參與賽車起步較遲,忙碌的演藝事業更令他分身不暇去練習。「眼見很多職業車手如舒密加,從六歲、八歲便接觸高卡車,從小訓練賽道上駕駛的觸覺。相反,我們在賽車歷程上已經少了一個層次。」不過,他的賽車經驗卻一次又一次提升,由近年以雷諾Clio出戰,到今次駕駛大馬力的Audi R8,無疑是對他駕駛技術的升級戰。「平時喺街上揸車覺得自己已經好快,搬到賽道上更將部車推至極限,但再睇埋職業車手嘅數據,佢哋入彎時可以將車速再推得更高,完全是技術的分野。」
除了技術,職業車手在行車時微細的「第六感」,好似今次Audi R8 LMS盃,均是廠方提供同級車種,也是同樣的工程團隊,不同的就只有車手透過中控台上各項微調,例如ABS、懸掛系統等。Aaron猜測當日同場的李英健,可能是將ABS完全關閉,全靠自己靈敏的腳感控制制動效果。說到此,Aaron即刻不忿地回憶上一站(珠海)的意外,「上次原本是想將ABS調細些少,但由於扭錯了左右輪胎嘅平衡,一踩Brake就失控,未能完成賽事。」所以今次內蒙站他給自己的目標就是「起碼要完成賽事!」目標未免太低吧?結果兩個回合的賽事,城城在第六回合的非專業車手組別勇奪亞軍呢!
因好友意外怕電單車
話說Aaron演藝事業重要一步,源於在台灣拍攝了一個電單車廣告,也算是與車有緣。不過,喜歡車喜歡速度感的他,自廣告後二十多年來好像與電單車再扯不上關係,原因?「其實一直以來我都覺得電單車好危險,一旦發生意外就好易嚴重受傷。特別是多年前我好朋友兼排舞老師Sunny Wong,因為駕駛電單車發生交通意外,嚴重受傷入院,親眼睇住佢喺醫院傷到吐血,加深我對電單車覺得危險嘅概念。」
Aaron的賽車事業未達巔峯,不少車手都會將自己未能達成的願望,轉移到下一代身上。Aaron亦不例外,他說假若將來有小朋友,都希望他能在十多歲時接受賽車訓練,而大前提是小朋友自己對汽車抱着同樣的興趣。果然是典型的愛車之人!
Audi R8 LMS Cup
網址: http://www.audir8lmscup.com/cn