香港越嚟越多剩／盛女，民主黨黃成智前排喺電視話，好多單身剩女係因為佢哋為咗增加性伴侶或者性觀念開放，謬論俾人鬧爆喇。噚日就有十幾位女士「自發」去到上水黃成智議辦抗議，要求成智道歉。
呢班女士有備而嚟，佢哋身穿耍太極嘅衫、手執功夫扇，大嗌「正義婦女，非常憤怒，強烈要求黃成智道歉」口號，又同場上演「九天玄女殲滅黃蟲智」。
唔知係咪九天玄女聲威震天，結果驚動警察到場，警察問帶隊女士姓名，佢自稱Sunny。Sunny話好多朋友不滿成智言論，佢自言冇政黨背景，日後會再狙擊黃成智喎。
黃成智禍從口出，八方聽聞出選港島嘅自由黨劉健儀，近日都好緊張，事關有消息話會有黑材料出街，雖然唔關佢事，但涉及名單上嘅邵家輝或李鎮強。知情者話若然有關黑材料曝光，選情略有起色嘅劉健儀頓時要冚旗，因此自由黨方面已準備好「防風」措施，閃避呢場政治風暴。