盛傳俾中聯辦打壓嘅數碼廣播電台DBC，早前向員工派遣散信，做埋今個月11號就封咪，點知轉頭又可能翻生，向政府申請今個月21號有7條數碼頻道啟播。大班鄭經翰噚晚喺「把聲留住」燭光集會上，就話到時會自己繼續開咪鬧爆政府，部份留低嘅員工仲願意半薪出糧，要為不公義發聲咁話。
燭光晚會有逾千人參加，迫爆中環遮打花園，高喊「還聲於民」。大班老友兼舊拍擋林旭華、李柱銘、朱耀明牧師、學者張達明同杜耀明都畀面支持。大班仲喺台上狠批李國章搞亂DBC，贏得唔少掌聲。大班老婆上台時話，好多謝咁多素未謀面嘅市民支持，令佢好感動。之後市民仲走去東亞銀行大廈綁上黑絲帶表達不滿。