有評論謂今年炒股不做不輸，多做多錯，小弟身同感受；沒錯季初波一向知難賭，但都要小試牛刀，重新起動；檢討開季首兩周得失，不少球會仍忙於組軍，任來投者名氣有幾大，也需時磨合。選材，向上力有態球隊埋手，今周看好頭門富咸、史雲斯同尾門紐卡素。好些英國領隊顧傳統，或者愛國情懷，不斷替球會高價買入所謂有潛質嘅土炮，近年利記係箇中「表表者」，去年1月安祖卡路爾3,500萬鎊來投，最受惠當然係其母會紐記，領隊柏度即大把水，一星換久安，將隊波越執越靚；今季初又有領隊之星史雲斯嘅勞特立，出售土炮祖阿倫同史葛冼佳亞，勁收超過2,100多萬鎊，再用7折價錢，已能購入西甲加蘇超等5-6位各地有經驗大國腳來投，開季表現飛躍，理財有道。史雲斯今晚迎戰嘅對手，係剛上周用逾2,500萬鎊，購入所謂當打嘅土炮翼鋒史堤芬費查同阿當莊臣嘅新特蘭，小弟唔係憎人富貴厭人窮，但這支東北軍嘅亂使錢程度當屬英超表表者，小弟今季未捧過今次主場呢隻天鵝，但見佢哋真係勢勁，唔怕追寶尾。
早場，富咸作客韋斯咸，後者升班後大執，更把炮借得安祖卡路爾；富咸則剛放走一個從未證明過乜嘅比利時仔迪比利，已大賺熱刺1,500萬鎊，今季先簽入嘅攻兵柏歷同洛迪列加俱屬免費，剛唔執輸想高價購貝碧托夫，財政穩建下，信今季信能平安度過。佢哋上仗僅負紅魔2:3，莊家再睇唔起佢哋，受讓今次主場嘅同市韋咸平/半；兩軍各添箭頭，賽事未打先加熱，但唔會即刻踢到曉飛，下盤可期。執得勁，甚至改打法，季初真係要少掂呢類波；明日場紐記迎維拉，紐記主場有幾勁球迷都知，保證坐爆5萬幾座位，丹巴巴亞上番力，對黑雙煞夾到熟晒；碰啱維拉中堅施亞蘭奇勒賽前開聲，叫大家畀多啲時間新帥林拔，話班波新兵又多，仲練緊由麥利殊時代嘅高Q大棍到家嘅地面多互傳踢法，聽佢咁講，維拉躉係暈得一陣陣，紐記1.5倍主W好穩，揀埋[-1]望英超尾門中到，度過十多天嘅英超真空期。下次見報：15/09文：蘋果波神