【中環】
曾經被指係翻版劉德華嘅江華雖然已經49歲，但同華仔一樣依然保養得好四正，好耐冇喺香港拍劇嘅佢，前日同老婆麥潔文（Kitman）現身中環擺花街，見江華無論個樣同身形都keep得唔錯，唔怪之得Kitman咁緊張個老公，就算江華整頭髮整足3個幾鐘，Kitman都要全程傍到實。
呆坐三個鐘
前日下晝4點左右，戴住帽嘅江華孖住老婆去中環一間髮型屋整頭，等老公嗰陣Kitman望住窗口發吽哣，相信佢應該等到好悶。大概7點幾，Kitman戴咗老公頂帽，蹺住整完頭髮嘅江華離開髮型屋，結婚20年都依然好恩愛。之前Kitman陪整頭髮陪足幾粒鐘，所以江華都好識做，陪老婆大人行街睇衫。
江華陪Kitman入咗間賣女裝嘅舖頭睇衫，見佢仲手指指向老婆畀意見，但最後Kitman都係冇收穫，跟住兩公婆搭港鐵離開。
採訪、攝影：陳辰、黃曉程