橫掃全球嘅《復》，十幾億美金票房，仲多過三星賠畀蘋果嗰筆錢。入戲院睇咗兩次，BD到手當然第一時間睇Bonus同製作特輯；30分鐘刪除片段，補回性感女神Johansson橋上大戰，拳腳功夫一啲都唔輸蝕俾班肌肉英雄！ 記者：徐影龍
靚環迴 圍住飛
當洲立一派貨落碟舖，已肯定成戲迷必搶Item。據旺角DVD Pro講，首批貨近200隻2D＋3D孖碟裝BD版，差不多一晚沽清，仲未計DVD版同鐵盒版，幾乎埋位畀錢嘅都有隻《復》喺手！
《復》片長140分鐘，一半以上係講古，始終係CG特技同打到飛天嘅戲碼最好睇，若期望有《夜神起義》般深度劇情，我會建議你睇蒼井空套《復仇者之死》好過。BD版聲畫效果交足功課，畫面流量經常性維持每秒30MB以上，黑位保留到細節，好似片初單眼局長坐直昇機追擊敵人，唔會出現「黑人黑夜打烏鴉」慘況；而聲效流量亦超過每秒5MB，DTS-HD MA 7.1，絕對比《Battleship》嘅5.1更令人High翻天，尤其Iron Man喺大廈穿梭，環迴定位靚到好似圍住你飛咁。唯一小彈係中置人聲偏弱，遇着口水悶場，更易令人昏昏欲睡。
附錄微電影製作認真
由於美版嚟緊有10碟裝「篋神」珍藏版，對普通版BD嘅Bonus內容，應該留有一手，不過要有嘅總算有齊，好似30分鐘刪除片段，雖然文戲居多，不過補番Black Widow同Hawkeye片末橋上大戰嘅動作戲份，由上映時既十幾秒，變成打足一分鐘有多，黑寡婦Fans應該心滿意足。至於隱藏OP同ED，講Hill喪鬧頂頭Boss，表面上似有取代單眼佬成新局長之勢，而NG片段就睇到班超級英雄玩嘢搞笑一面。呢堆Bonus唔係差，不過唔夠喉囉。
反而收錄早前喺聖地牙哥動漫節首播嘅《Item 47》微電影，最令人驚喜。講述《復》紐約大戰後，高科技武器流落民間，一對賊公賊婆點樣改邪歸正成為神盾局探員，短短11分鐘，製作及特技一絲不苟，好希望有續集。
$268
（2D＋3D孖碟裝）
10碟裝豪華「篋神」
收錄六齣Avengers成員藍光碟，另加3D版及Bonus共10隻碟，另附一堆機密檔案及特別封套，再以神盾局手提箱作包裝，入面嚿「魔方」仲識着藍燈㖭，就算係美版無中文字幕，都必定炒到七彩。
