被指係黑箱選出嚟嘅演藝學院新校長Adrian Walter，今日履新，話說之前喺澳洲國立大學做院長嘅佢，被指因為冇咗份工先嚟演藝，搞到演藝校友同文化界極力反對，唔明點解會搵個唔熟悉亞洲狀況嘅人做校長。
Walter噚日約傳媒聚會，當然例牌否認指控啦，又賣口乖話呢份係佢嘅dream job，諗咗5秒就決定做喎。為盡快入鄉隨俗，佢改咗個中文名叫華道賢，上月頭抵港之後又密密出巡，見咗唔少業界中人。
講到工作目標，大致都係提高畢業生競爭力、加強同內地交流合作同國際化等，至於佢期望做嘅exciting projects，好似起表演中心、科技公司等，目前都係得個諗字。