距離九月九日立法會選舉只有一個星期，各區直選形勢，若根據now新聞台贊助港大民意研究計劃所做嘅滾動調查（每日刊登在信報、有線電視之滾動調查，因不見有報紙詳細刊登，睇唔到），真係日日滾動，睇到選民眼都花，不知誰人會肯定當選。
左丁山每日睇一次滾動調查，發覺全港只有超級區議會五席之中，工聯會陳婉嫻可以大膽講一句，肯定當選，如果佢落選，就似足馬王「同德」跑第四，累到馬迷跳樓一樣。陳婉嫻在民調遙遙領先，其他能當選嘅有何俊仁、涂謹申、馮檢基、劉江華與李慧琼，白韻琹就機會好微，除陳白兩人外，其餘五人皆有機會當選或落選，好緊張。不可不知，在各區調查之中，回答「不知」（即游離票）嘅，最低有25%（九龍西），最多有31%（新界東），比例咁鬼大，一旦呢批「不知」選民在九月九日入到票站「就知」，戰況怎可以預測得到？
在此情況之下，人人自危，講配票喎，開玩笑咩，一旦配錯咗，將自己啲票俾咗人，偏偏自己就係差幾百票，選唔到，賴邊個好？泛民固然各為其主打餐死，一票不能少，互相攻擊在所不惜，民建聯工聯會同出一派，票源相近，聽西環戰略而配票，最有規律，非民主派一盤散沙之流可比，但即管如此，今年睇怕西環選舉操盤人都大傷腦筋，隨時會配錯票，弄到同路人兩敗俱傷。
傳媒工作者L小姐幾年前加入工聯會為會員，為求睇中醫、買化粧品、日用品之類有優惠，有折扣而已，攞咗會員咭，從來唔參加工聯會之政治活動。上星期突然收到電話，叫佢記得在港島區投票，一個人有兩票，超級區議員選舉千萬要投俾嫻姐，港島區直選一票就投俾王國興。L小姐問：「唔係投俾鍾樹根咩，我樓下見到好多傳單話投票李慧琼鍾樹根喎！」對方急急澄清：「佢兩個係民建聯，唔係工聯會呀，記住係投陳婉嫻、王國興！」L小姐其實上次在港島區投票俾余若薇，今年港島區冇余若薇，佢都唔知投俾邊個好！（按：超級區議會競選人見上文，港島區候選人有下列名單：陳家洛、曾鈺成、葉劉淑儀、劉嘉鴻、勞永樂、何秀蘭、鍾樹根、單仲偕、王國興、劉健儀、許清安、吳文遠、吳榮春、何家泰。）