市場對於美國聯儲局會唔會出QE3，似乎半信半疑，內地又遲遲唔放水。晉佳以陰謀論睇，中美又進入類似舊年8月之前嘅博弈形勢。舊年8月之前嘅中美棋局，俾歐債危機一下截停咗，但今次棋局重開，就變得更複雜。目前美國經濟穩定程度強過中國，原本可以睇住中國嚟食，只要中國捱唔住放水，美國即刻加個QE3，催谷內地高通脹及資產泡沫，實行谷爆中國。不過，美國總統大選臨近，共和黨參選人羅姆尼擺明唔妥聯儲局主席伯南克同QE，選情大有機會影響伯老嘅決定，所以美國可能等唔到中國出手，自己先放水。
恒指市賬率僅1.33倍
對港股投資者嚟講，最好梗係中歐美一齊放水啦，但晉佳都唔敢亂估，講吓值博率仲好。先講吓家同舊年8月之前有乜分別。第一，經濟差咗，美國經濟緩慢復蘇，但同時內地經濟有硬着陸嘅憂慮，歐洲唔少國家步入負增長；第二，歐債危機惡化，希臘可能破產，西班牙財政危機進一步露底；第三，通脹比一年前低，放水條件增加；第四，投資者一年前睇法樂觀，家偏向悲觀，基金持現金水平較一年多之前明顯大增；第五，恒指舊年8月前市賬率1.8倍，家係1.33倍。上述五個要點，其實都有一定關連，歐債危機露底、內地同歐洲經濟惡化，先至會令市場更悲觀，揸多啲Cash，同時令恒指市賬率更低。究竟1.33倍左右嘅市賬率代表乜嘢？第一，大家覺得拎1蚊出嚟投資藍籌股，嗰1蚊喺未來只能夠獲得好低好低嘅回報；第二，資產價格有急挫風險；第三，人類解決眼前危機嘅板斧有限。各國肯定會喺目前經濟疲弱之下做番啲嘢，放水亦對資產價格穩定有幫助，所以喺家形勢同估值之下，晉佳保持審慎樂觀。配合埋晉佳之前講恒指周線圖MACD指標，反映恒指已終止長線跌勢，咁睇嚟做好友嘅值博率係高啲。個股嘅估值已經反映好悲觀嘅事，建行（939）家市賬率得番1.2倍左右，國壽（2628）股價對內涵價值得1.45倍左右，代表大家覺得兩間公司長遠賺錢能力極低。只要未來冇明顯轉差，股價就已經有唔錯嘅上升空間，至於下跌空間亦應該有限。晉佳本欄逢周一、三及五刊出