早輪,深圳蒲吧專家馬蘭奴個表妹程程牛一,每年佢嘅生日派對都例有唔少靚女出席,我哋一班豬朋狗友早早收到風,自然約埋齊齊北上玩餐飽啦!文、攝:吧少
派對舉行嘅地點係「No.88 搜浩」。嗰晚,我哋一行六人就浩浩蕩蕩操上去同馬蘭奴會合。大師兄話之前都嚟過呢間深圳區豪場好幾次,呢度屬羅湖式典型多元化娛樂酒吧。入到去一望,裝潢果然相當豪華,有巨型打碟專用台,而跳舞表演區仲有好幾個㖭。
壽星女程程一早到場招呼大家,而佢嗰班好姊妹亦陸續嚟到。正當大家忙於互相介紹嘅時候,經理捧住一個透明骷髏頭過嚟,原來係一隻新推嘅伏特加,馬蘭奴都算係咁喇,表妹牛一送上成三千人仔嘅美酒,我哋梗係唔同佢客氣啦!原來事情唔係咁簡單,表面上係馬蘭奴做大豪客,實情係大師兄同酒筲箕兩個出嘅鬼主義,根本係佢兩條友仔暗地出錢,以為男嘅一定飲贏班女仔!點知表妹啲女仔Friend不但猜得,仲超飲得,搞到連向來枚技有番咁上下嘅大師兄都輸到係咁飲,話咁快仲要衝入洗手間獲利回吐㖭!其他幾個壯男亦開始頂唔順,一係借意去睇跳舞表演回一回氣,一係醉到瞓着咗。哈!你班衰仔都有今日咯,今次仲唔唱足你哋一年!
No.88 搜浩地址:深圳羅湖區嘉賓路4018號爵士大廈一樓電話:(86)755-25898603營業時間:9:00pm-5:00am酒水收費:各地啤酒¥35/支