貝碧花心，費倫火滾！貝碧托夫一日內玩謝曼聯、費倫天拿同祖雲達斯；飛嚟飛去搞咗成日，佢最後決定去富咸。
周三，費倫同曼聯傾掂數，轉會費500萬歐元（約4,900萬港元），畀貝碧轉會，雙方簽約3年，年薪190萬歐元。費倫仲出埋機票錢，畀貝碧由曼徹斯特飛去佛羅倫斯，而球會管理層同球迷仲打算去接機㖭，夠晒誠意！點知，當貝碧搭到去慕尼黑轉機嗰陣，收到個電話，原來祖記都對佢好有興趣；佢諗咗諗，祖記話晒有歐聯踢，就決定留喺慕尼黑，同祖記傾條件。
祖記富咸中途齊截劫
祖記願意畀貝碧更高人工，250萬歐元年薪，簽約兩年；貝碧都接受咗。同時間，祖記壓曼聯價，只肯畀450萬歐元轉會費，仲要分期付款；曼聯都費事搞咁多嘢，區區50萬就豪畀你！當單交易接近落實嗰陣，又有第3間球會搵貝碧，今次到富咸。
話晒都係英超球會，加上家人都習慣咗英國生活，所以貝碧再次轉軚，決定加盟富咸。事實上，貝碧同富咸領隊祖爾都好有交情；06年，祖爾教緊熱刺嗰陣，就係佢將貝碧由利華古遜帶嚟英超。
費倫火滾：佢配唔起我哋
俾貝碧玩到陀陀擰嘅費倫梗係好嬲啦，仲發聲明鬧爆貝碧、祖記同富咸：「其他球會嘅傲慢同自大，違背公平競爭同體育道德。對於嗰位球員，我哋好高興佢冇加盟，因為佢配唔起呢個城市，配唔起呢件球衣，更加配唔起我哋嘅精神！」
祖記總經理馬路達就大呼冤枉，「係貝碧同費倫傾唔掂數之後，我哋先同曼聯傾。我知道富咸都有邀請佢，佢話會睇晒所有球會嘅邀請，再作決定。」祖爾亦證實，貝碧周四已經到咗倫敦，到富咸體測。就睇吓呢位上季被曼聯打入冷宮、但聯賽5次正選入到7球嘅前英超神射手，可唔可以一吐烏氣，重振雄風！
轉會窗關閉前已落實或潛在交易
施薩索拉斯＊
前效球會：國際米蘭
加盟球會：昆士柏流浪
轉會費：免費
格尼路＊
前效球會：皇家馬德里
加盟球會：昆士柏流浪
轉會費：900萬鎊
史葛冼佳亞
現效球會：史雲斯
傳聞加盟球會：曼城
轉會費：800萬鎊
洛里斯
現效球會：里昂
傳聞加盟球會：熱刺
轉會費：1,230萬鎊
＊為已落實